គុយបា៖ ក្រុមប្រឹក្សាកីឡាប្រដាល់គុយបា បានផ្តល់ភ្លើងបៃតងអនុញ្ញាតឱ្យកីឡាការិនីប្រដាល់ដែលមានបំណងចូលរួមប្រកួតព្រឹត្តិការណ៍ផ្លូវការ អាចចូលរួមប្រកួតបានជាលើកដំបូង។ ការសម្រេចអនុញ្ញាតនេះកើតមានឡើងលើកដំបូងបង្អស់ក្រោយបដិវត្តឆ្នាំ ១៩៥៩ របស់លោក Fidel Castro។

ប្រទេសស្ថិតនៅតំបន់ការ៉ាអ៊ីប អាមេរិកកណ្តាល បានគ្រងតំណែងក្នុងការបង្ហាញវត្តមានកំពូលកីឡាករប្រដាល់ខ្លាំងៗជាច្រើនរូបរាប់សិបឆ្នាំមកហើយ និងឈរនៅលើកំពូលតារាងគ្រងមេដាយមាស នៃព្រឹត្តិការណ៍កីឡាអូឡាំពិក ពោលធ្លាប់ឈ្នះមេដាយមាសអូឡាំពិកសរុប ៤១គ្រឿង រាប់ចាប់ពីឆ្នាំ ១៩៧២ ដែលជាព្រឹត្តិការណ៍កីឡាអូឡាំពិក នៅទីក្រុង Munich ប្រទេសអាល្លឺម៉ង់។ កន្លងមកកីឡាការិនីប្រដាល់របស់គុយបា ត្រូវបានហាមចូលរូមការប្រកួតផ្លូវការ ដែលនាំឱ្យកីឡាការិនីភាគច្រើនបង្ខំចិត្ត ចេញទៅវ៉ៃនៅក្រៅប្រទេសរហូតមក។

ថ្មីៗនេះ ក្រោយការអនុម័តរបស់រដ្ឋាភិបាលអនុញ្ញាតឱ្យកីឡាការិនីអាចចូលរួមប្រកួតដោយស្របច្បាប់ លោក Ariel Sainz អនុប្រធានវិទ្យាស្ថានកីឡាជាតិគុយបាបានថ្លែងថា កីឡាប្រដាល់ស្រ្តីនៅគុយបា នឹងនាំយកគុយបាទៅក្នុងតារាងនៃមេដាយអន្តរជាតិ និងពិភពលោក។

គួរបញ្ជាក់ថា កាលពីឆ្នាំ២០០៩ គណៈកម្មាធិការអូឡាំពិកអន្តរជាតិ (IOC) បានប្រកាសថា ស្រ្តីអាចចូលរួមប្រកួតក្នុងវិញ្ញាសាកីឡាប្រដាល់បាន ហើយក្រោយមក ៣ឆ្នាំ ពោលគឺវិញ្ញាសាប្រដាល់ស្រ្តីត្រូវបានដាក់ចូលក្នុងការប្រកួតកីឡាអូឡាំពិកទីក្រុងឡុងដ៍ ឆ្នាំ២០១២ , ព្រឹត្តិការណ៍កីឡាអូឡាំពិក ទីក្រុងរីអូ ដឺ ចាណេរ៉ូ ឆ្នាំ២០១៤ និងកីឡាអូឡាំពិក ទីក្រុងតូក្យូ ឆ្នាំ២០២០។

គិតមកទល់បច្ចុប្បន្ន គុយបា ជាប្រទេសមួយដែលមានសក្តានុពល ប៉ុន្តែមិនចូលរួមក្នុងការប្រកួតប្រដាល់នារីឡើយក្នុងសមាគមកីឡាប្រដាល់អន្តរជាតិ (IBA) ដែលជាសមាគមមានសមាជិកចំនួន ២០២ ប្រទេស និងជាតិសាសន៍៕